ചെറുവത്തൂര്‍ ഉപജില്ലാ കലോത്സവം; ബ്ലോഗ് ശ്രദ്ധേയമാകുന്നു

ചെറുവത്തൂര്‍ :  കുട്ടമത്ത് ഗവ ഹയര്‍സെക്കന്ററി സ്‌കൂളില്‍ നടന്നവരുന്ന ചെറുവത്തൂര്‍ ഉപജില്ലാ കലോത്സവത്തിന്റെ ബ്ലോഗ് ശ്രദ്ധേയമാകുന്നു. കലോത്സവ മത്സരഫലങ്ങള്‍ പ്രഖ്യാപിച്ച് നിമിഷങ്ങള്‍ക്കകം തന്നെ ബ്ലോഗിലൂടെ അറിയാന്‍ കഴിയുന്നു എന്നതാണ് ഇതിന്റെ പ്രത്യേകത. പ്രധാനവേദികളിലെ മത്സരങ്ങളെല്ലാം തത്സമം ബ്ലോഗിലൂടെ സംപ്രേക്ഷണം ചെയ്യുന്നുണ്ട്. ഇതുകൂടാതെ കലോത്സവ വാര്‍ത്തകളും ചിത്രങ്ങളും ബ്ലോഗ് വഴി ജനങ്ങളിലെത്തിക്കുന്നുണ്ട്. അയ്യായിരത്തി അഞ്ഞൂറിലേറെ പേരാണ് ഇതിനോടകം www.kalolsavamcheruvathur.blogspot.inഎന്ന

ബ്ലോഗ് സന്ദര്‍ശിച്ചത്. ഫേസ്ബുക്ക് വഴിയും ബ്ലോഗിലെ വിശേഷങ്ങള്‍ അറിയുന്നതിനുള്ള സൗകര്യവും ഒരുക്കിയിട്ടുണ്ട്. കലോത്സവ നഗരിയിലെത്തിയ കെ.കുഞ്ഞിരാമന്‍ എംഎല്‍എയും സഹപ്രവര്‍ത്തകരും വാര്‍ത്താ വിശേഷങ്ങള്‍ക്കുവേണ്ടി ബ്ലോഗ് സന്ദര്‍ശിക്കുകയും ചെയ്തു. സോഷ്യല്‍നെറ്റ്‌വര്‍ക്ക് മാധ്യമങ്ങള്‍വഴിയുള്ള പ്രചരണങ്ങള്‍ കലോത്സവത്തിന്റെ മാറ്റ് വര്‍ദ്ധിപ്പിക്കുന്നതായും അദ്ദേഹം അഭിപ്രായപ്പെട്ടു.  മീഡിയ കമ്മിറ്റി കണ്‍വീനര്‍ എം.വി ജയദീപ്, ചന്തേര ബിആര്‍സി ട്രെയ്‌നര്‍ മഹേഷ് കുമാര്‍, അധ്യാപകരായ രാഹുല്‍ ഉദിനൂര്‍, വിനയന്‍ പിലിക്കോട്, വെബ്ഡിസൈനര്‍ വിജേഷ് ചന്തേര എന്നിവരാണ് ബ്ലോഗ് പ്രവര്‍ത്തനങ്ങള്‍ നിയന്ത്രിക്കുന്നത്. കഴിഞ്ഞവര്‍ഷം കയ്യൂരില്‍ നടന്ന ജില്ലാ കലോത്സവത്തിന് ബ്ലോഗ് വഴി മത്സരഫലങ്ങള്‍ അറിയിച്ചിരുന്നെങ്കിലും ഉപജില്ലാ കലോത്സവത്തിന് ഇത് ആദ്യമായാണ് ബ്ലോഗ് സൗകര്യം പ്രയോജനപ്പെടുത്തുന്നത്. വിദേശരാജ്യങ്ങളിലുള്ളവര്‍പോലും കലോത്സവ ബ്ലോഗിന്റെ സന്ദര്‍ശന പട്ടികയില്‍ ഇടംപിടിച്ചിട്ടുണ്ട്. ആയിരത്തിലേറെ പേര്‍ ഓരോദിവസവും ബ്ലോഗ് സന്ദര്‍ശിക്കുന്നുണ്ട്.